|
Seigneurs, sachiez qui or ne s'en ira
En cele terre ou Dex fu mors et vis
Et qui la croiz d'outremer ne prendra
A paines mes ira en paradis
Or s'en iront eil vaillant bacheler
Qui aiment Dieu et l'ennor de cest mont
Qui sagement vuelent a Dieu aller
Et li morveus, li cendreus demorront
Avugles sunt, de ce ne dout je mie
Qui un secors ne fait Dieu en sa vie
Et por si pou pert la gloire dou mont
Seigneurs, sachiez.
Diex se lessa por nos en crois pener
Et nos dira au jor ou tuit vendront:
"Vos qui ma crois m'aidastes a porter
Vos en irez la ou mi angle sont
La me verrez et ma mere Marie
Et vos par cui je n'oi onques aïe
Descendrez tuit en enfer le parfont."
Seigneurs, sachiez.
Chascuns cuide demorer toz haitiez
Et que ja mes ne doie mal avoir
Ainsi les tient Anemis et pechiez
Que il n'ont sens, hardement ne pooir
Biax sire Diex, ostés leur tel pensee
Et nous metez en la vostre contree
Si saintement que vos puissons veoir
|
|
